Autore e emisionit Elhame Zhitia-Krasniqi

Emisioni i parë ”Dallëndyshja”

Hyrja:

Edukimi, shkollimi, ngritja gjithpërfshirëse dhe komunikimi i mirëfilltë në familje janë kusht për të krijuar profilin e të rinjve shqiptarë që e duan familjen, e ruajnë gjuhën e çmojnë të kaluarën, janë të aftë për të ardhmen dhe që e kultivojnë dashurinë për vendlindjen dhe e ruajnë identitetin dhe që janë faktorë ndryshimesh në zhvillim si në mesin ku jetojnë dhe në atë nga vijnë.

Eli (Uppsala 2009)

 “ Dallëndyshja” emisioni i parë

Të dashur lexues të vegjël e të rritun andej nga jeni në të katër anët e botës:

Mirë se vini në faqen e ”Dallëndyshja” të Radiodiasporës

Të dashur fëmijë, ju që keni ardhur në këtë botë si rrjedhim i dashurisë, të tillë do të jeni përherë jo vetëm për prindërit e juaj, por për ne të gjithëve që ju rrethojmë, se ju jeni ardhmëria jonë, ju jeni gëzimi ynë, ju jeni vetë lumturia e jetës.

Unë  Elhame Zhitia-Krasniqi, dhe xaxhi Ibo - Ibrahim Hoxha që është edhe drejtor i kësaj radioje dhe është në teknikë gjatë emisioneve tona përcjellim përshëndetjen tonë nga zemra, një përshëndetje që ju e meritoni gjithmonë:

Paqi shëndet dhe jetë të hareshme.

“Dallëndyshja” ...

Kështu kam titulluar këtë emision tuajin, sepse ashtu sikurse ne që na ka mbërthyer fati në mërgim, ashtu edhe shumë nga poetët tanë, sidomos ata të Rilindjes Kombëtare, patën të njëjtin fat, si ne, të jetojnë larg mëmëdheut.

Por aso kohe mundësi komunikimi ishte ndonjë letër që përcillej mik pas miku e që udhëtonte me muaj për të shkuar në mëmëdhe.

Mundësi tjetër ishte dëshira e shprehur me vargje që ndonjë zog shtegtar të fluturojë dhe të përcjellë përshëndetjet, mallin e dashurinë deri në vendlindje.

Shko dallëndyshe

Udha e mbarë se erdh pranvera,
shko, dallendyshe tue fluturue,
prej Misirit n'dhena tjera,
fusha e male tue kerkue;
n'Shqipni shko, pra, fluturim,
shko ne Shkoder, n'qytetin tim.

Shendet prej meje te m'i falesh
saj shpise vjeter ku kam le,
me ato vende rreth t'perfalesh,
ku kam shkue kohen e re;
atje shko, pra, fluturim,
fal me shndet qytetit tim.

Me ato male, me ato kodra,
me ato prroje rreth t'perfalesh
n'ato fusha qe m'ka Shkodra
te lulzueme, aty t'ndalesh;
tue kndue me ambelcim,
fal me shndet qytetit tim.

T'mujsha dhe un' me fluturue
dojsha dhe un' me u nise me ty,
dojsha n'Shkoder me kalue,
m'e pa prap at'vend me sy!
Por... ti shko atje... fluturim
e ti qajma fatin tim.

_­­­_________________

Këshu pra Filip Shiroka, poeti ynë i madh, i uronte udhë të mbarë dallëndyshes për në mëmëdhe.

Unë, pra ju them: Ejani Dallendyshe të jemi së bashku në Radiodiasporë me emisionin tuaj “Dallëndyshja”.

Sot mundësia për komunikim është krejt ndryshe. Në momentin që e themi fjalën, atë ( fjalën ) ka mundësi të na e  dëgjojnë familja dhe të afërmit kudo që janë në botë. Në atë çast që ne hedhim një shkronjë në tastaturë ka mundësi ta lexojnë njerëzit tanë të shpirtit gjithandej nëpër botë.

Pra fëmijë të dashur,

Le të jetë ky emision dhe kjo faqe një gur sa do i vogël në themelet e krijimit të identitetit tuaj, të mësimit dhe ruajtjes së gjuhës tonë të bukurë, të kultivimit të vlerave tona të lashta kulturore dhe si urë lidhëse mes nesh nga do që na ka degdisur fati i jetes.

Pra, fëmijë të dashur, pse jo edhe ju të rinj, “dallëndyshe” kudo që jetoni jeni  të mirëseardhur me sugjerimet e juaja, me dëshirat e juaja se çfarë do të donit të trajtojmë në këtë emision tuajin.

Ne sigurisht se kemi çka të flasim me ju e për ju, të flasim për dëshirat që ju keni, për ëndërrat që ju thurni.

Do të lexojmë bashkë përralla e tregime, do të këndojmë e thurim vargje ashtu siç kanë bërë shumë shkrimtar tanë për ju si: Naim  Frashëri, Odhise Grillo, Naum Prifti, Bedri Dedja, Rexhep Hoxha, Ali Huruglica, Rifat Kukaj, Gani Xhafolli, Rizah Sheqiri, Muhamet Krasniqi, Halil Xani, Agim Metbala, Agim Gashi, e shumë të tjerë.

Ju ka rënë të na keni dëgjuar ne të themi shpesh  se ju jeni ardhmëria jonë, ashtu është. Por jemi ne ata që duhet të ju krijojmë si ardhëmëri e fortë dhe e ëmbël, njikohësisht e dashur dhe e ashpër ashtu siç është edhe vetë jeta e ju do ta kuptoni më vonë këtë. Ne bëjmë përpjekjet tona që përmes afrisë dhe dashurisë që kemi për ju të përpiqemi që ju të keni një edukatë të shëndoshë dhe këtë mund ta bëjmë në shumë mënyra: përmes lojërave, argëtimit, leximit, tregimeve, përrallave dhe mundësive të tjera të shumta të komunikimit, në mënyrë qe ju të rriteni dhe edukoheni ashtu siç është më së miri dhe të trashëgoni gjithë ato virtyte që ne si komb i kemi. Për ne që jetojmë në mërgim mbetet shumë e rëndësishme që të përpiqemi ta ruajmë gjuhën, që ju të keni mundësi t’i shijoni tingujt melodikë të kësaj gjuhe kaq të ëmbël - gjuhës sonë shqipe.

“Sa gjuhë flet aq herë je njeri”

E çka nuk mund të flasim ne, ju të dashur i keni dëshirat pa kufi, ju e doni nënën, babain,motren, vëllan, gjyshen, gjyshin, e doni atdheun , por ju e doni edhe lojën, se ajo ju rrit. I doni edhe përrallat, e pikërisht me një përrallë e kemi filluar emisionin tonë të par për ju.

Autore e emisionit Elhame Zhitia-Krasniqi